Hopp til hovedinnholdet

Ode til havren

Åsmund Bjørnstad

Dikt av Åsmund Bjørnstad

Klokker av havre som ute i regnet

dropetungt heng ifrå tallause åk,

ringer for ingen all åkeren lang;

til grønklokker, gulklokker, lutande toppars

sølvøyredobbar når blinkande soldrypp

kløyvde i grønt krystallinsk klorofyll,

 

bind karbonet til korn, kalligrafisk,

i rader ned åkerens hallande bokrull

med skriftteikn du nyfiken ser meir enn skjønar;

 

dei stiller deg inn, gradvis fylt og meir still,

ein musikk i august, då du ikkje tenkjer: snart

er alt forbi; for eit anna tek til,

 

då klokker som grøne var snart blir gule

og kling i rislene tørre når sigden

svisjande bind nek av nyfylt gullregn,

 

der skysshestar ein gong fekk gomle om natta

på godt med mjuk halm som saug i seg pisset

så dei neste morgon stod nystrigla klare

 

den gong då havren var stor, essensiell,

var diesel for samferdsla, og drog plogen,

livsnødvendig som saltet; på ny

 

blir du no ropt fram or enkle kår,

rehabilitert, lik ein tarveleg dialekt,

sjølveigar blitt, dei siste dei første,

 

helsebot, gryna no, sertifiserte

for blodtrykk og tykktarm, i hudkrem og såpe;

så når, i høgt solstøv, havren blir treskt,

 

klokkene pensla mot blått med spissar

så tynne som tråden i ditt enorme genom,

som ingen, så lenge, har brydd seg om nøste –

 

då, sålda og sikta for agner og halm,

kimar mot stålet den oppfylte tyngda

i klokker som kling ut, fornya.

 

Frå boka Åsmund Bjørnstad: Åkeren på Manhattan, Det norske Samlaget 2018. 

Åkeren på Manhattan

Havrekalenderen

9.00-15.30 21. januar 2020

Oslo

17.00-20.00 21. januar 2020

Norske Felleskjøp, Schweigaards gate 34E, 5. etasje, Oslo

8.00-16.00 26. mars 2020
Developed by Aplia - Powered by eZ Publish -�Informasjonskapsler